لعل ابو بندر لياله طويله
عسا الحميدي المنايا تعداه
ابن الرجال اللي تعادل قبيله
واهل الكرم والطيب والعز والجاه
عز الرفيق ليا شكى الوقت ميله
مزبان من ضاقت عليه وتنصاه
والطيب لوحمله ثقل يرتكيله
لو الشقى من مكسب الطيب ياطاه
قليل من ياقف وقوفه باجيله
وقليل من يوصف بوصفه وشرواه
اللي ليا مني تضايقت اجيله
ولايذخر اللي يملك كف يمناه
والله يكثربالجماعه مثيله
والله يعز اللي يسوي سواياه
ويوفقه في كل يومه وليله
ويسهل اموره بدينه ودنياه
ماقلتها في طيب الساس حيله
طيبه سبق قليلن بمدحه نظمناه
وفيه المدايح لو مدحت قليله
ولو الشعر يطول بالمدح مكفاه
والرجل في دنياه وشوا حصيله
ان ماكسب معروف والطيب سواه
ليا انتها عمره وقرب رحيله
واقفا وخلا الحي والمال خلاه
بس الكفن ماغير لاقفا يشيله
هذا الذي من كسب دنياه خاواه
وعماله اللي بالعمر تنحصيله
ويذكربها لاحل ذكره وطرياه
واللي رحل ماطاب وعتزتيله
يموت ماحدن يفتكربه وينعاه
مايفقده غير الاهل والحليله
اللي ليا منه مضا عام تنساه
ليست هناك تعليقات:
إرسال تعليق